سميرة: الرجولة أصبحت عملة نادرة في ليبيا

شنت سميرة الفرجاني وزيرة الشؤون الاجتماعية بحكومة «الإنقاذ» المنبثقة عن انقلاب فجر ليبيا، هجوماً على مجتمع الرجال في ليبيا على خلفية موقف شخصي حدث معها أثناء قيادتها للسيارة في أحد شوارع طرابلس.
وقالت الفرجاني:” ليش الرجولة أصبحت قليلة إلا ما رحم ربي.. حصلت توة في ذكر معاه عجوز في راس حسن وهو يداعك بالسيارة كأنه سكران وقفت للمرور كلمته قالي هذا شيباني ومعاه عيله ما يتحشم وطلع رأسه وقعد يصيح”.
وأضافت الفرجاني، عبر حسابها على “فيسبوك”:” المهم هزبه المرور وطلعت نجري شدها في جرتي جري، ويصور في سيارتي على أساس بيخوفني”.
وتابعت:” أصلا لو راجل ما كان دار هكي ومعه امرأة في السيارة بس، واضح إن عنده إحساس بالنقص فايت حده”.
واستطردت:” غريب جدا اللي قاعد يصير ليش الرجولة أصبحت عملة نادرة، اللي يتزوج وحده ويطلقها يرميها ويرمي صغارها وتقعد تجري في المحاكم بيش تحصل منه نفقه لكي توكل صغاره لين أطيح قدره في المحاكم ويعطي الأموال وهو صاغر”. وأوضحت الفرجاني:” اللي يتوفى بوه يقعد يجري، علي بيع بيت العيلة اللي ساتر أمه وأخواته ومش مهم عنده وين يمشو المهم هو ياخذ حصته فلوس، واللي يكلمه يقوله هذا شرع الله.. لما ربي دار الميراث مش بيش تتجبر علي النساء ياضلالي، واللي مبهدل زوجته وبخيل مع صغاره ويضرب فيهم ويهين في أمهم قدامهم ويضرب فيها يحسابها رجله لا والله ماتعرف الرجوليه ولاخطمت عليك”.
وواصلت حديثها قائلة:” لا أدري شنو بلاهم ذكور هل الوقت هل العيب في قلة التربية من الأساس أم دلع الأمهات اللي طلعت أغلبهم بدون شخصيه ومجرد بوق ينعق بما لايفقه، شاد فقط للذكر، مثل حظ الأنثيين أو مثنى وثلاث ورباع، هذا ماحافظ من دينه”.
واختتمت الفرجاني، منشورها قائلة:” تعلموا الرجولة يا أشباه الرجال القاع امتلأ ليش رجال قبل نادر، تلقى واحد ما يصلحش الأغلبية رجولية واحترام وتلقى عنده هيبة.. توة لاهيبة ولا أخلاق ولا أدب والمصيبة أغلبهم كبار في السن مش شباب طايش الواحد يلقاله عذر، خسئتم والله، مع احترامي للقلة المحترمة.